Top
Sneha TV

మహిళా ఉద్యోగిపై విచక్షణారహితంగా దాడి: డిప్యూటీ మేనేజర్ సస్పెండ్

మహిళా ఉద్యోగిపై విచక్షణారహితంగా దాడి:  డిప్యూటీ మేనేజర్ సస్పెండ్
X

బాధ్యత గల హోదాలో ఉన్న అధికారి ఓ మహిళా సిబ్బందిపై విచక్షణారహితంగా దాడికి పాల్పడిన సంఘటన నెల్లూరు జిల్లాలోని ఆంధ్రప్రదేశ్‌ టూరిజం హోటల్‌ లో చోటుచేసుకుంది. ఎపి టూరీజం హోటల్‌ లో కాంట్రాక్ట్ ఉద్యోగిగా పని చేస్తున్న మహిళపై డిప్యూటీ మేనేజర్‌ భాస్కర్‌ దాడికి పాల్పడ్డాడు. గత శనివారం ఈ సంఘటన జరుగగా విషయం ఆలస్యంగా వెలుగులోనికి వచ్చింది.

కరోనా నేపథ్యంలో ఉద్యోగులంతా మాస్కు ధరించాలని ఆదేశాలు జారీ చేశారు. దీంతో ఉద్యోగులంతా మాస్కు ధరించగా, డిప్యూటీ మేనేజర్‌ భాస్కర్‌ మాత్రం పట్టించుకోలేదు. ఈ నేపథ్యంలో మాస్క్ ధరించాలని మహిళా ఉద్యోగి ఉషారాణి సూచించగా, తనకే సలహాలు ఇస్తావా అంటూ విచక్షణ కోల్పోయిన ఆయన ఆమెపై రాడ్ తో దాడి చేశాడు. తోటి ఉద్యోగులు కలుగజేసుకొని ఆయనను బయటకు పంపించారు.

అనంతరం బాధితురాలితో కలిసి పోలీసులకు ఫిర్యాదు చేశారు. దాడికి సంబంధించిన సన్నివేశాలు సిసి కెమెరాల్లో నిక్షిప్తం కావడంతో వాటిని పోలీసులు పరిశీలించారు. ఈమేరకు పోలీసులు డిప్యూటీ మేనేజర్‌ భాస్కర్‌ రావుపై కేసు నమోదు చేశారు.

ఘటనపై స్పందించి ఎపి మహిళా కమీషన్ :

మరోవైపు మహిళా ఉద్యోగి ఉషారాణిపై జరిగిన దాడిని ఆంధ్రప్రదేశ్‌ మహిళా కమీషన్‌ చైర్ పర్సన్‌ వాసిరెడ్డి పద్మ తీవ్రంగా ఖండించారు. విషయం తెలియడంతో ఆమె నెల్లూరుకు బయలుదేరి ఉషారాణిని పరామర్శించారు. దివ్యాంగురాలైన మహిళపై దాడి చేయడం అమానుషం అన్నారు. డిప్యూటీ మేనేజర్‌ భాస్కర్‌ చర్యలు సభ్య సమాసం తలదించుకునేలా ఉందని మండిపడ్డారు. మహిళలపై దాడిని సహించేదిలేదన్నారు. ప్రభుత్వం వెంటనే స్పందించి దాడిచేసిన ఉద్యోగిని విధుల నుంచి సస్పెండ్‌ చేసిందని వెల్లడించారు. ఇలాంటి చర్యలు పునరావృతం అయితే తీవ్రంగా ఉంటుందని ఆమె హెచ్చరించారు.

Next Story
Share it