ఈ సంక్రాంతికి ‘గేమ్ ఛేంజర్’, ‘డాకు మహారాజ్’, ‘సంక్రాంతికి వస్తున్నాం’ సినిమాలు బాక్సాఫీస్ దగ్గర తలపడుతున్నాయి. అయితే వీటిలో ‘గేమ్ ఛేంజర్’, ‘డాకు మహారాజ్’ సినిమాల మధ్యనే ప్రధాన పోటీ అని చెప్పవచ్చు. ఎందుకంటే మెగా-నందమూరి బాక్సాఫీస్ వార్ కి ఎప్పుడూ ఫుల్ క్రేజ్ ఉంటుంది. పైగా సంక్రాంతి సీజన్ కావడంతో ఈ రెండు సినిమాల పోరుపై ప్రేక్షకుల దృష్టి మరింత పడింది. ‘గేమ్ ఛేంజర్’, ‘డాకు మహారాజ్’లలో ఏ సినిమా సంక్రాంతి విజేతగా నిలుస్తుందనే ఆసక్తి ఉంది. అయితే ప్రస్తుత పరిస్థితి చూస్తుంటే.. ‘డాకు మహారాజ్’ చిత్రమే పైచేయి సాధించే అవకాశాలు కనిపిస్తున్నాయి. (గేమ్ ఛేంజర్)
‘గేమ్ ఛేంజర్’ తాజాగా ప్రేక్షకుల ముందుకు రాగా, ‘డాకు మహారాజ్’ జనవరి 12న థియేటర్లలో అడుగుపెట్టనుంది. అయితే ‘గేమ్ ఛేంజర్’పై విడుదలకు ముందు నుంచే నెగటివ్ వైబ్స్ కనిపించాయి. దాదాపు నాలుగు సంవత్సరాల క్రితం ఈ విషయం. రామ్ చరణ్, శంకర్ కాంబినేషన్ లో ఫస్ట్ మూవీ కావడంతో.. మొదట్లో ఈ సినిమాపై ప్రేక్షకుల్లో ఆసక్తి బాగానే ఉంది. కానీ ఇండియన్-2 కారణంగా ‘గేమ్ ఛేంజర్’ షూటింగ్ బాగా ఆలస్యమవ్వడంతో.. ఆ ఆసక్తి సన్నగిల్లుతూ వచ్చింది. ఇక ట్రైలర్ విడుదల తర్వాత.. ఇది ఒకప్పటి శంకర్ మార్క్ సినిమా కాదని, ఒక రెగ్యులర్ కమర్షియల్ ఫిల్మ్ అనే క్లారిటీకి అందరూ వచ్చేశారు. అందుకు తగ్గట్టుగానే తాజాగా విడుదలైన ఈ చిత్రం, మొదటి షో నుంచే డివైడ్ టాక్ తెచ్చుకుంది. భారీతనం, చరణ్ నటన తప్ప సినిమాలో చెప్పుకోడానికి ఏం లేదనే కామెంట్స్ వినిపిస్తున్నాయి. దీంతో ఇప్పుడు అందరి దృష్టి ‘డాకు మహారాజ్’పై పడింది. (డాకు మహారాజ్)
‘అఖండ’, ‘వీరసింహారెడ్డి’, ‘భగవంత్ కేసరి’ హ్యాట్రిక్ హిట్స్ తర్వాత బాలకృష్ణ నుంచి వస్తున్న సినిమా కావడంతో ‘డాకు మహారాజ్’పై మొదటి నుంచి ప్రేక్షకుల్లో భారీ అంచనాలున్నాయి. ట్రైలర్ కూడా కట్టుకోవడంతో ఆ అంచనాలు రెట్టింపు అయ్యాయి. ముఖ్యంగా ట్రైలర్ లో విజువల్స్ మెస్మరైజ్ చేశాయి. ఇప్పుడు ‘గేమ్ ఛేంజర్’కి నెగటివ్ టాక్ రావడంతో, ‘డాకు మహారాజ్’కి పాజిటివ్ టాక్ వచ్చినా.. బాక్సాఫీస్ దగ్గర సంచలన వసూళ్లు రాబట్టే అవకాశం ఉంది. అదే జరిగితే ‘డాకు మహారాజ్’ సంక్రాంతి విన్నర్ గా నిలుస్తుంది.
