- విద్యార్థి దశ నుండి స్మగ్లర్ గా ఎదిగిన యువకుడు
- 50 కిలోల ఎండు గంజాయి, రెండు కార్లు, ఒక బైక్ స్వాధీనం
- పటాన్ చెరు డీఎస్పీ రవీందర్ రెడ్డి
పటాన్ చెరు, ముద్ర ప్రతినిధి: అంతర్రాష్ట్ర గంజాయి స్మగ్లర్ ను పటాన్ చెరు పోలీసులు అరెస్టు చేశారు. గత 8 సంవత్సరాలుగా ఆంధ్రప్రదేశ్, తెలంగాణ, మహారాష్ట్ర రాష్ట్రాల పరిధిలో గంజాయి సరఫరా చేస్తూ పోలీసులకు చిక్కకుండా తప్పించుకు తిరుగుతున్న మోస్ట్ వాంటెడ్ స్మగ్లర్ మల్లేష్ జాదవ్ ను పోలీసులు అదుపులోకి తీసుకున్నారు. గురువారం పటాన్ చెరులో ఏర్పాటు చేసిన సమావేశంలో డీఎస్పీ రవీందర్ రెడ్డి వివరాలు. కర్ణాటక రాష్ట్రం బీదర్ జిల్లా బాల్కీ తాండాకు చెందిన మల్లేష్ జాదవ్ (26) హైదరాబాద్ పరిధిలోని రాజేంద్రనగర్ లో టిఫిన్ సెంటర్‌లో పనిచేస్తూ, ప్రవృత్తిగా గంజాయి సరఫరా చేస్తూ, అంతర్రాష్ట్ర స్మగ్లర్ గా ఎదిగాడు. 2019 సంవత్సరంలో బాల్కీలో డిగ్రీ చదువుతూ చెడు వ్యసనాలకు అలవాటుపడ్డాడు. స్థానికంగా పరిచయమున్న యువకులతో కలిసి కారు డ్రైవర్‌గా పనిచేస్తూ ఆంధ్రప్రదేశ్ రాష్ట్రంలోని అరకు నుండి గంజాయిని సేకరించి మహారాష్ట్రలోని గంజాయి స్మగ్లర్ దా పాటీలకు సరఫరా చేసేవారు.
తదనంతరం తనే సొంతంగా గ్రూపును తయారు చేసి గంజాయి స్మగ్లింగ్ ప్రారంభించాడు. ఆంధ్రప్రదేశ్ తో పాటు ఒరిస్సా రాష్ట్ర పరిధిలోని మల్కనగిరి జిల్లా నుండి గంజాయిని కొనుగోలు చేసి మహారాష్ట్ర, తెలంగాణ రాష్ట్రాలలో విక్రయించడం ప్రారంభించింది. సరఫరా చేసిన ప్రతిసారి లక్షల్లో ఆదాయం రావడంతో దీనిని వృత్తిగా మార్చుకున్నాడు. గంజాయి సరఫరాలో సంపాదించిన సొమ్ముతో సొంత గ్రామమైన బాల్కీ తండాలో భూములు కొనుగోలు చేసి సొంత ఇల్లు కూడా కొనుగోలు చేశాడు.
ఈ నేపథ్యంలో హైదరాబాద్ నుంచి సొంత కారులో 50 కిలోల గంజాయి తీసుకొని కోహిర్ మండలం మనియార్‌పల్లికి చెందిన వ్యక్తికి అందజేసేందుకు వెళుతున్న సందర్భంగా గురువారం మధ్యాహ్నం పటాన్ చెరు మండలం కర్థనూరు గ్రామ శివారులోని ఓఆర్‌ఆర్ సర్వీస్ రోడ్డు వద్ద బీడీఎల్ భానూర్ పోలీస్ స్టేషన్ సీఐ స్వామి గౌడ్ వాహనాలను తనిఖీ చేస్తున్న నిందితుడిని అదుపులోకి తీసుకున్నట్లు డీఎస్పీ రవీందర్ రెడ్డి తెలిపారు. పూర్తి విచారణ అనంతరం నిందితుడి నుండి రెండు కార్లు, ఒక ద్విచక్ర వాహనం స్వాధీనం చేసుకున్నట్లు ఆయన తెలిపారు. ఈ సమావేశంలో సీఐలు స్వామి గౌడ్, ప్రవీణ్ రెడ్డి, ఎస్ఐ భరత్ భూషణ్, జరిగింది.
