Share this on your social network:
Published:
14-09-2018

మీ వల్లే సురక్షితంగా ఉంటున్నాం

 

న్యూదిల్లీ: టెలిఫోన్లు, మొబైల్‌ఫోన్లు రాక ముందు అ యినవారిని పలకరించుకోవడానికి ఉత్తరాలే ప్రధాన మాధ్యమాలుగా ఉండేవి. అయితే ఇప్పుడు పోస్ట్ కార్డు కొని లేఖ రాసే తీరిక ఎవరికీలేదు. ఆత్మీయులను పలకరించుకోవడానికి వాట్సాప్‌లో ఓ మెసేజ్‌, ఒక ఫోన్ కాల్‌తో సరిపెట్టేస్తున్నాం. అయితే పలువురు విద్యార్థులు మాత్రం మన సైనికుల సేవలు కొనియాడుతూ వారికి లేఖలు రాశారు. 'శత్రువుల నుంచి మీరు మమ్మల్ని రక్షిస్తున్నారు. ఈ దేశం కోసం సరిహద్దుల్లో మీ ప్రాణాలను పణంగా పెడుతున్నారు' అంటూ ఆ లేఖల్లో ప్రస్తావించారు. వాటిని రక్షణ శాఖా మంత్రి నిర్మలా సీతారామన్‌ అధికారిక ట్విటర్ ఖాతాలో పోస్ట్ చేశారు. 'దేశం కోసం నిర్విరామంగా, నిస్వార్థంగా సైనికులు సేవలు అందిస్తున్నారు. చిన్నారులు రాసిన లేఖలు వారిపై కృతజ్ఞతను చూపిస్తున్నాయి' అని ఆమె ట్వీట్‌ చేశారు.

విద్యార్థులను ఈ మార్గంలో ప్రోత్సహించిన తల్లిదండ్రులు, ఉపాధ్యాయులను ఆమె ప్రశంసించారు. ఈ చర్య తమనెంతో ఆకట్టుకుందని తెలిపారు. ఇలాంటివి మరిన్ని అందుకోవడానికి ఎదురు చూస్తున్నామన్నారు. పిల్లలు రాసిన లేఖలు, బొమ్మలను ఇండియా గేట్ వద్ద ప్రదర్శనకు ఉంచనున్నట్లు ఆమె తెలిపారు. మెరుపుదాడులు జరిగి రెండు సంవత్సరాలు పూర్తి కావొస్తున్న నేపథ్యంలో సెప్టెంబరు 27న వాటిని ప్రదర్శిస్తారు.

Related Images



Related News